Foydalanuvchi kelishuvi

1. Atamalar

Kelishuvda ishlatiladigan atamalar ushbu hujjat oxiridagi 1-ilovada izohlangan. Ilovada izohlanmagan atamalar O'zbekiston Respublikasi qonunchiligidagi ma'nosida tushuniladi.

2. Kelishuv predmeti

Operator Foydalanuvchiga platformadan uning funksional imkoniyatlari doirasida, tanlangan tarif shartlariga muvofiq foydalanish uchun oddiy (nomutlaq) litsenziya beradi. Litsenziya O'zbekiston Respublikasi hududida va butun dunyoda, Kelishuv amal qiladigan muddat davomida amal qiladi.

Platforma quyidagi imkoniyatlarni taqdim etadi (tarifga qarab tarkibi farqlanadi):

• normativ-huquqiy hujjatlar bazasi asosida sun'iy intellekt yordamida savollarga javob olish, manbalar va modda raqamlari bilan;
• normativ-huquqiy hujjatlar bo'yicha qidiruv, jumladan rekvizitlar va hujjat ichidagi moddalar bo'yicha;
• shartnoma va boshqa hujjatlarni tahlil qilish, xavflarni aniqlash, hujjat loyihalarini tayyorlash;
• mehnat, soliq, sud va muvofiqlik masalalari bo'yicha ixtisoslashgan tahlil vositalari;
• tanlangan hujjatlardagi o'zgarishlarni kuzatish (Radar) va xabarnomalarni Telegram orqali olish;
• biznes va yuridik firmalar uchun ish maydoni: hujjatlar ombori, mijoz ishlari, jamoa bilan ishlash;
• Telegram boti (@legalio_bot) orqali qisqa huquqiy javoblar olish.

Platforma yuridik xizmat ko'rsatmaydi. Legalio – axborot-tahliliy dasturiy vosita. U "Advokatura to'g'risida"gi O'zbekiston Respublikasi Qonuni ma'nosidagi advokatlik faoliyati yoki yuridik yordam hisoblanmaydi, Foydalanuvchi va Operator o'rtasida advokat va mijoz munosabatini vujudga keltirmaydi.

Platforma natijalari (javoblar, tahlillar, hujjat loyihalari) sun'iy intellekt tomonidan avtomatik yaratiladi va xatolik, noaniqlik yoki eskirgan ma'lumotni o'z ichiga olishi mumkin – jumladan modda raqamlari, muddatlar, summalar va hujjatning amalda ekanligi bo'yicha. Muhim qaror qabul qilishdan oldin (sudga murojaat, shartnoma imzolash, hisobot topshirish va h.k.) natijani rasmiy manbada (lex.uz) tekshirish va zarur hollarda malakali yuristga murojaat qilish Foydalanuvchining majburiyatidir.

Platformadagi normativ hujjatlar matni ochiq rasmiy manbalardan olinadi va rasmiy nashr hisoblanmaydi. Hujjatlarning holati (amalda / kuchini yo'qotgan) va tahririyati avtomatik yangilanadi, biroq kechikish bilan aks etishi mumkin.

3. Ro'yxatdan o'tish va hisob

Platformaning to'liq imkoniyatlaridan foydalanish uchun ro'yxatdan o'tish talab etiladi. Ro'yxatdan o'tishda elektron pochta, parol, ism-familiya va hisob turi (jismoniy shaxs, biznes yoki yuridik firma) ko'rsatiladi; biznes va firma hisoblari uchun tashkilot nomi ham kiritiladi.

Platformada 18 yoshga to'lgan va to'liq muomala layoqatiga ega shaxslar ro'yxatdan o'tishi mumkin. Yuridik shaxs nomidan ro'yxatdan o'tgan shaxs shunday qilishga vakolati borligini tasdiqlaydi.

Foydalanuvchi:

• ro'yxatdan o'tishda to'g'ri va dolzarb ma'lumot kiritadi;
• parolini maxfiy saqlaydi va uni uchinchi shaxslarga bermaydi – hisobi orqali amalga oshirilgan barcha harakatlar Foydalanuvchining o'zi tomonidan qilingan deb hisoblanadi;
• hisobiga ruxsatsiz kirilganini bilsa, darhol Operatorga xabar beradi;
• bepul savollar chegarasini yoki boshqa cheklovlarni chetlab o'tish maqsadida bir nechta hisob ochmaydi.

Biznes va firma tariflarida hisob egasi jamoa a'zolarini taklif qiladi, ularning rollarini belgilaydi va a'zolarning platformadagi harakatlari uchun javobgar bo'ladi. Tarifning umumiy limiti jamoa a'zolari o'rtasida taqsimlanadi.

Foydalanuvchi o'z Telegram hisobini platformaga ixtiyoriy ravishda ulashi mumkin (Radar xabarnomalari uchun). Bunda Operator Telegram chat identifikatorini saqlaydi; ulanishni istalgan vaqtda uzish mumkin.

4. Tariflar, bepul savollar va to'lov

Platforma bo'limlaridan foydalanish pullik tariflar (obuna) asosida amalga oshiriladi. Tariflar tarkibi, oylik so'rov limitlari va narxlari legalio.uz/pricing sahifasida e'lon qilinadi va Kelishuvning ajralmas qismi hisoblanadi.

Bepul sinov muddati berilmaydi. Obunasiz Foydalanuvchi (shu jumladan ro'yxatdan o'tmagan shaxs) kuniga 2 tagacha savolni bepul berishi mumkin. Ro'yxatdan o'tgan obunasiz Foydalanuvchi platformaning asosiy bo'limlarining har biridan 30 kunda 1 marta bepul foydalanishi mumkin (bitta foydalanish birinchi amaldan boshlab 24 soat davom etadi va sun'iy intellektning bitta amalini o'z ichiga oladi); undan keyin bo'limdan foydalanish uchun obuna talab etiladi. Ish maydoni (jamoa bo'limlari) faqat obuna bilan ishlaydi. Kompaniya bepul foydalanish shartlarini o'zgartirishga haqli.

To'lov Payme yoki Click to'lov tizimlari orqali O'zbekiston so'mida oldindan, bir martalik amalga oshiriladi. Obuna 1, 3, 6 yoki 12 oyga rasmiylashtiriladi (1 oy = 30 kun); uzoq muddatga e'lon qilingan chegirmalar qo'llaniladi.

Platforma avtomatik uzaytirish va kartadan avtomatik pul yechishni qo'llamaydi. Obuna muddati tugagach, platforma bo'limlari yopiladi, Foydalanuvchi ma'lumotlari saqlanib qoladi; obunani davom ettirish uchun Foydalanuvchi yangi to'lov qiladi.

To'lov to'lov tizimidan muvaffaqiyatli tasdiq olingan paytdan boshlab amalga oshirilgan hisoblanadi va tarif shu zahoti faollashadi. Operator bank kartasi ma'lumotlarini saqlamaydi – ular faqat to'lov tizimi tomonidan qayta ishlanadi.

Oylik so'rov limiti tugaganda, keyingi oy boshlanguncha yoki yuqoriroq tarifga o'tilguncha platformaning tegishli imkoniyatlari cheklanadi. Ishlatilmagan limit keyingi davrga o'tkazilmaydi.

Operator tarif narxlari va tarkibini o'zgartirishi mumkin. Yangi narx allaqachon to'langan davrga ta'sir qilmaydi.

To'lovni qaytarish. Xato yoki ikki marta amalga oshirilgan to'lov, shuningdek Operator aybi bilan to'langan xizmat ko'rsatilmagan hollarda pul Foydalanuvchining yozma murojaati asosida 10 ish kuni ichida to'lov amalga oshirilgan usulda qaytariladi. Boshqa hollarda to'langan davr uchun qaytarish O'zbekiston Respublikasi qonunchiligida nazarda tutilgan tartibda amalga oshiriladi.

5. Platformadan foydalanish qoidalari

Foydalanuvchi quyidagilarga haqli:

• platforma natijalaridan o'z faoliyatida, jumladan mijozlariga xizmat ko'rsatishda foydalanish;
• tayyorlangan hujjat loyihalari va tahlillarni yuklab olish, tahrirlash va eksport qilish;
• natijani ulashish havolasi orqali uchinchi shaxslar bilan bo'lishish.

Foydalanuvchiga quyidagilar taqiqlanadi:

• platforma yoki uning ma'lumotlar bazasidan avtomatlashtirilgan usulda (skript, bot, skreyping) ma'lumot yig'ish;
• platformaning dasturiy kodini dekompilyatsiya qilish, teskari muhandislik qilish, xavfsizlik tizimlarini chetlab o'tishga urinish;
• platformaga ortiqcha yuklama berish, uning ishini buzish yoki boshqa foydalanuvchilarning ishlashiga xalaqit berish;
• hisobni, jumladan pullik tarifga kirishni uchinchi shaxslarga sotish, ijaraga berish yoki tarif shartlaridan tashqari foydalanishga berish;
• platformadan qonunga xilof maqsadlarda, jumladan firibgarlik, soxta hujjat tayyorlash yoki uchinchi shaxslar huquqlarini buzish uchun foydalanish;
• tegishli huquqiy asossiz uchinchi shaxslarning shaxsga doir ma'lumotlarini, tijorat yoki boshqa qonun bilan qo'riqlanadigan sirni yuklash;
• platforma natijalarini advokat yoki davlat organining rasmiy xulosasi sifatida taqdim etish.

Ulashish havolasi yaratilganda havola egasi bo'lgan har qanday shaxs natijani ko'rishi mumkin. Havolani kimga berish va unda qanday ma'lumot borligi uchun Foydalanuvchi javobgar.

Ushbu qoidalar buzilganda Operator oldindan ogohlantirmasdan hisobga kirishni to'xtatib turishi yoki bloklashi mumkin. Qoidabuzarlik tufayli bloklangan hisob uchun to'langan mablag' qaytarilmaydi.

6. Intellektual mulk

Platformaning dasturiy ta'minoti, interfeysi, dizayni, "Legalio" nomi va logotipi, ma'lumotlar bazasining tuzilishi, normativ hujjatlarga berilgan izohlar va tasniflar Operatorga tegishli va qonun bilan himoya qilinadi. Kelishuv Foydalanuvchiga ularga nisbatan 2-bo'limda ko'rsatilganidan boshqa huquq bermaydi.

Normativ-huquqiy hujjatlarning rasmiy matnlari "Mualliflik huquqi va turdosh huquqlar to'g'risida"gi Qonunning 8-moddasiga muvofiq mualliflik huquqi obyekti hisoblanmaydi va ulardan erkin foydalanish mumkin.

Foydalanuvchi yuklagan hujjatlar va kiritgan ma'lumotlar Foydalanuvchining mulki bo'lib qoladi. Foydalanuvchi Operatorga ularni faqat xizmat ko'rsatish maqsadida (saqlash, tahlil qilish, natija tayyorlash) qayta ishlash huquqini beradi. Operator bu materiallarni boshqa foydalanuvchilarga oshkor qilmaydi va ulardan o'z mahsulotini reklama qilishda foydalanmaydi.

Platforma tomonidan Foydalanuvchi uchun tayyorlangan natijalardan Foydalanuvchi cheklovsiz foydalanishi mumkin.

7. Kafolatlar va javobgarlik

Platforma "boricha" (as is) taqdim etiladi. Operator platformaning uzluksiz va xatosiz ishlashini, natijalarning to'liq, aniq yoki Foydalanuvchining muayyan maqsadiga mos bo'lishini kafolatlamaydi.

Operator texnik ishlar, yangilanishlar yoki uchinchi shaxslar (xosting, sun'iy intellekt provayderlari, to'lov tizimlari, lex.uz) sabab bo'lgan uzilishlar uchun javobgar emas. Rejali texnik ishlar haqida imkon qadar oldindan xabar beriladi.

Operator quyidagilar uchun javobgar emas:

• Foydalanuvchining platforma natijalarini mustaqil tekshirmasdan qabul qilgan qarorlari va ularning oqibatlari;
• Foydalanuvchi kiritgan noto'g'ri yoki to'liq bo'lmagan ma'lumot asosida olingan natijalar;
• Foydalanuvchi parolini saqlamagani yoki ulashish havolasini uchinchi shaxslarga bergani oqibatlari;
• boy berilgan foyda va boshqa bilvosita zararlar.

Qonunchilikda ruxsat etilgan doirada Operatorning Kelishuv bo'yicha umumiy javobgarligi zarar yetkazilishiga sabab bo'lgan hodisadan oldingi 12 oy davomida Foydalanuvchi platforma uchun amalda to'lagan summa bilan cheklanadi va har qanday holatda 10 000 000 (o'n million) so'mdan oshmaydi.

Ushbu bo'limdagi cheklovlar Operatorning qasddan yoki qo'pol ehtiyotsizlik bilan yetkazgan zarari uchun, shuningdek qonunchilikka ko'ra cheklab bo'lmaydigan javobgarlikka nisbatan qo'llanilmaydi.

Foydalanuvchi o'zi yuklagan materiallar va platformadan foydalanishi uchinchi shaxslar huquqlarini buzmasligi uchun javobgar bo'ladi.

8. Shaxsga doir ma'lumotlar

Foydalanuvchining shaxsga doir ma'lumotlari "Shaxsga doir ma'lumotlar to'g'risida"gi O'zbekiston Respublikasi Qonuniga va Legalio Maxfiylik siyosatiga muvofiq qayta ishlanadi. Maxfiylik siyosati Kelishuvning ajralmas qismi hisoblanadi.

Kelishuvni aksept qilish orqali Foydalanuvchi o'z shaxsga doir ma'lumotlarini xizmat ko'rsatish uchun zarur hajmda qayta ishlashga rozilik beradi.

Foydalanuvchi quyidagilardan xabardor ekanini tasdiqlaydi:

• savol va hujjatlar matni javob tayyorlash uchun sun'iy intellekt provayderlaridan biriga – Google (Gemini) yoki OpenAI xizmatiga uzatiladi; bu xizmatlar O'zbekiston Respublikasidan tashqarida joylashgan. Saytda yuborishdan oldin matndagi aniqlangan shaxsiy ma'lumotlar (ism-familiya, JShShIR, pasport, telefon, karta va hisob raqamlari va boshqalar) avtomatik yashiriladi, biroq bu barcha holatlarda to'liq aniqlanishi kafolatlanmaydi;
• platforma ma'lumotlari Shvetsiyada joylashgan serverda saqlanadi;
• Foydalanuvchi uchinchi shaxslar (mijozlar, xodimlar, kontragentlar) ma'lumotlarini yuklaganida ularni qayta ishlash uchun huquqiy asos mavjudligini o'zi ta'minlaydi.

Batafsil: Maxfiylik siyosati.

9. Kelishuvni tuzish, o'zgartirish va bekor qilish

Kelishuv aksept qilingan paytdan kuchga kiradi va nomuayyan muddatga tuziladi.

Operator Kelishuvni bir tomonlama o'zgartirishi mumkin. Yangi tahrir ushbu sahifada e'lon qilinadi, muhim o'zgarishlar haqida esa Foydalanuvchiga elektron pochta yoki platforma orqali kamida 10 kun oldin xabar beriladi. O'zgarish kuchga kirgandan keyin platformadan foydalanishni davom ettirish yangi tahrirni qabul qilish hisoblanadi.

Foydalanuvchi Kelishuvni istalgan vaqtda bekor qilishi mumkin – buning uchun platformadan foydalanishni to'xtatadi va hisobini o'chirish haqida Operatorga murojaat qiladi. Hisob va unga bog'liq ma'lumotlar murojaat olingan kundan boshlab 30 kun ichida o'chiriladi, qonunchilikka ko'ra saqlanishi shart bo'lgan ma'lumotlar (masalan, to'lov yozuvlari) bundan mustasno.

Operator Foydalanuvchi Kelishuvni jiddiy buzgan hollarda Kelishuvni bir tomonlama bekor qilishi mumkin.

Operator platforma faoliyatini butunlay to'xtatgan holda Foydalanuvchilarga kamida 30 kun oldin xabar beradi, ma'lumotlarni yuklab olish imkonini yaratadi va to'langan, ammo foydalanilmagan davr uchun mablag'ni qaytaradi.

10. Nizolarni hal qilish

Kelishuv O'zbekiston Respublikasi qonunchiligiga muvofiq tartibga solinadi va talqin qilinadi.

Nizolar dastlab muzokaralar yo'li bilan hal qilinadi. Talabnoma (pretenziya) Operatorga yozma shaklda yoki elektron pochta orqali yuboriladi va olingan kundan boshlab 30 kun ichida ko'rib chiqiladi.

Kelishuvga erishilmasa, nizo O'zbekiston Respublikasi qonunchiligida belgilangan sudlovlilik qoidalariga muvofiq tegishli sudda hal qilinadi. Foydalanuvchi iste'molchi sifatida "Iste'molchilarning huquqlarini himoya qilish to'g'risida"gi Qonun bilan berilgan huquqlardan, jumladan o'z yashash joyidagi sudga murojaat qilish huquqidan mahrum etilmaydi.

11. Yakuniy qoidalar

Agar Kelishuvning biror qoidasi haqiqiy emas deb topilsa, bu qolgan qoidalarning amal qilishiga ta'sir qilmaydi.

Kelishuv o'zbek, rus va ingliz tillarida e'lon qilinishi mumkin. Tafovut yuzaga kelganda o'zbek tilidagi matn ustun hisoblanadi.

Foydalanuvchi va Operator o'rtasidagi elektron pochta, platforma xabarnomalari va Telegram orqali yozishmalar yozma shakldagi yozishma hisoblanadi.

Operator Kelishuv bo'yicha huquq va majburiyatlarini Foydalanuvchiga xabar bergan holda o'z huquqiy vorisiga o'tkazishi mumkin.

12. Operator rekvizitlari

Nomi

[KOMPANIYA TO'LIQ NOMI]

STIR

[STIR]

Yuridik manzil

[YURIDIK MANZIL]

Bank rekvizitlari

[BANK REKVIZITLARI]

Elektron pochta

[ELEKTRON POCHTA]

Telegram

@legalio_admin (qo'llab-quvvatlash), @legalio_bot

Veb-sayt

legalio.uz

1-ilova. Atamalar

Platforma, Legalio

– legalio.uz veb-sayti, uning barcha sahifalari, funksiyalari va @legalio_bot Telegram boti.

Operator

– platformani boshqaruvchi va Kelishuvni taklif qiluvchi yuridik shaxs (12-bo'limda ko'rsatilgan).

Foydalanuvchi

– Kelishuvni aksept qilgan va platformadan foydalanayotgan jismoniy yoki yuridik shaxs, shu jumladan jamoa hisobiga taklif qilingan a'zo.

Hisob

– Foydalanuvchining platformadagi elektron pochta va parol orqali kiriladigan shaxsiy kabineti.

Tarif

– platforma imkoniyatlari, oylik so'rov limiti, jamoa a'zolari soni va narxini belgilovchi foydalanish rejasi.

Bepul foydalanish

– obunasiz shaxs kuniga bera oladigan 2 tagacha savol va har bir asosiy bo'limdan 30 kunda 1 marta foydalanish.

So'rov

– sun'iy intellekt yordamida bajariladigan har bir amal: savolga javob, hujjat tahlili, loyiha tayyorlash va boshqalar.

Natija

– platforma tomonidan Foydalanuvchi so'rovi asosida yaratilgan javob, tahlil, hisobot yoki hujjat loyihasi.

Radar

– Foydalanuvchi tanlagan normativ hujjatlardagi o'zgarishlarni kuzatib, xabar beruvchi funksiya.

Ish maydoni

– biznes va yuridik firma tariflarida tashkilot a'zolari birgalikda ishlaydigan bo'lim.

Ulashish havolasi

– Natijani hisobga kirmasdan ko'rish imkonini beruvchi maxsus havola.