Maxfiylik siyosati

1. Biz qanday ma'lumot yig'amiz

Platformadan foydalanganingizda quyidagilar saqlanadi:

• Hisob ma'lumotlari: elektron pochta, ism-familiya, hisob turi (jismoniy shaxs, biznes yoki yuridik firma), tashkilot nomi (biznes va firma hisoblari uchun), parol — ochiq holda emas, qaytarib bo'lmaydigan bcrypt xesh ko'rinishida.
• Siz yuklagan hujjatlar: fayl va undan ajratib olingan matn.
• Yozishmalar: AI ga bergan savollaringiz va olingan javoblar, tahlil hisobotlari, hujjat loyihalari.
• Ish maydoni ma'lumotlari: ish (matter) nomi, tavsifi, muddatlari, siz kiritgan mijoz nomi, jamoa a'zolari va ularning rollari.
• Telegram ulanishi: Radar xabarnomalari uchun Telegram hisobingizni ulasangiz — Telegram chat identifikatori.
• To'lov ma'lumotlari: tanlangan tarif, muddat, summa, to'lov tizimi (Payme yoki Click) va undagi tranzaksiya raqami, to'lov holati.
• Foydalanish ma'lumotlari: so'rovlar soni, tarif holati, tashkilot ichidagi amallar jurnali (kim nima qilgani).

Biz bank kartasi ma'lumotlarini saqlamaymiz — ular faqat to'lov tizimi tomonidan qayta ishlanadi. Biometrik yoki genetik ma'lumotlarni yig'maymiz.

2. Mijozlaringiz ma'lumoti — muhim eslatma

Agar siz yurist, firma yoki ish beruvchi bo'lsangiz va platformaga mijozingiz, xodimingiz yoki kontragentingiz hujjatini yoxud ismini kiritsangiz, o'sha shaxs ma'lumotiga nisbatan siz javobgar hisoblanasiz: bunday ma'lumotni kiritishga tegishli huquqiy asos va zarur bo'lsa rozilik olish sizning zimmangizda. Biz bu ma'lumotni faqat sizga xizmat ko'rsatish uchun qayta ishlaymiz.

3. Ma'lumot nima uchun ishlatiladi

• Savolingizga javob tayyorlash, hujjatni tahlil qilish va loyiha yaratish.
• Hisobingizni yuritish, tarif, obuna muddati va oylik limitlarni hisoblash.
• To'lovni qabul qilish va tasdiqlash.
• Siz tanlagan hujjatlardagi o'zgarishlar haqida xabar berish (Radar).
• Xizmat xavfsizligini ta'minlash, suiiste'mol va texnik nosozliklarni aniqlash.
• Xizmat sifatini yaxshilash — umumlashtirilgan, shaxsni aniqlab bo'lmaydigan ko'rinishda.

Biz hujjatlaringiz va yozishmalaringizni reklama uchun ishlatmaymiz va uchinchi shaxslarga sotmaymiz.

4. Ma'lumot kimlarga uzatiladi

Xizmat ko'rsatish uchun ma'lumotning zarur qismi quyidagilarga uzatiladi:

• Sun'iy intellekt provayderlari — Google (Gemini API) va OpenAI (OpenAI API). Javob tayyorlash uchun savolingiz va tegishli hujjat matni shu xizmatlardan biriga yuboriladi. Ular O'zbekistondan tashqarida joylashgan serverlarda ishlaydi.
• To'lov tizimlari — Payme va Click. To'lov uchun buyurtma raqami va summa uzatiladi. Karta ma'lumotlarini siz to'g'ridan-to'g'ri to'lov tizimiga kiritasiz.
• Telegram. Hisobingizni ulagan bo'lsangiz, Radar xabarnomalari Telegram orqali yuboriladi.
• Xosting provayderi — platforma serverlari joylashgan kompaniya (5-bo'lim).

Maxfiylik qalqoni. legalio.uz saytida AI ga yuborishdan oldin matndagi ism-familiya, tashkilot nomi, JShShIR, pasport, STIR, telefon, karta va hisob raqamlari hamda e-mail avtomatik aniqlanadi va [SHAXS_1] kabi shartli belgilarga almashtiriladi. AI xizmati asl qiymatlarni ko'rmaydi; javobda ular serverimizda qayta tiklanadi. Nechta ma'lumot yashirilgani javob ostida ko'rsatiladi. Aniqlash avtomatik bo'lgani uchun ayrim ma'lumotlar (masalan, manzillar yoki odatiy bo'lmagan ismlar) aniqlanmasligi mumkin — juda nozik ma'lumotni yuklashdan oldin shuni hisobga oling. Telegram botida bu himoya hozircha qo'llanmaydi.

Davlat organlariga ma'lumot faqat O'zbekiston Respublikasi qonunchiligida belgilangan asos va tartibda beriladi.

5. Ma'lumot qayerda saqlanadi

Platforma ma'lumotlari hozirda Shvetsiyada (Yevropa Ittifoqi hududida) joylashgan serverda saqlanadi; AI provayderlariga yuborilgan matn ularning infratuzilmasida qayta ishlanadi.

"Shaxsga doir ma'lumotlar to'g'risida"gi Qonunning 27¹-moddasiga ko'ra O'zbekiston hududida saqlanishi majburiy bo'lgan ma'lumotlar — biometrik, genetik ma'lumotlar va telekommunikatsiya operatorlari foydalanuvchilarining ma'lumotlari. Platforma bunday ma'lumotlarni yig'maydi.

Boshqa shaxsga doir ma'lumotlar mamlakatdan tashqarida qonunda belgilangan shartlardan biri bajarilganda saqlanishi mumkin. Operator ushbu shartlarga muvofiqlikni ta'minlash choralarini ko'rmoqda; bu bo'lim shunga muvofiq yangilanadi.

6. Ochiq havolalar

Hisobot yoki ish holatini mijozga yuborish uchun yaratilgan havola hisobga kirmasdan ochiladi — havolani biladigan har qanday shaxs undagi ma'lumotni ko'radi. Havolaga parol qo'yish, amal qilish muddatini va ko'rishlar sonini cheklash hamda uni istalgan vaqtda bekor qilish mumkin.

7. Ma'lumotni himoyalash choralari

• Parollar bcrypt algoritmi bilan xeshlanadi — ochiq holda saqlanmaydi va tiklab bo'lmaydi.
• Sessiyalar muddatli tokenlar orqali boshqariladi; parol o'zgartirilganda barcha faol sessiyalar uziladi.
• Parolni tiklash havolalari bazada faqat xesh ko'rinishida saqlanadi, bir martalik va 1 soat amal qiladi.
• Tashkilot ichida ma'lumotga kirish rol asosida cheklanadi; muhim amallar jurnalga yoziladi.
• Ma'lumot uzatish HTTPS orqali shifrlanadi.

Shunga qaramay, internetda mutlaq xavfsizlikni hech kim kafolatlay olmaydi. Ma'lumotlar xavfsizligi buzilgani aniqlansa, zarar ko'rgan Foydalanuvchilarga xabar beramiz.

8. Saqlash muddati va o'chirish

Ma'lumot hisobingiz faol bo'lgan davrda saqlanadi.

Hisobingizni yoki ayrim ma'lumotlarni o'chirishni so'rashingiz mumkin — hozircha bu so'rov qo'llab-quvvatlash xizmati orqali bajariladi (saytda o'zi o'chirish tugmasi hali mavjud emas). So'rov olingan kundan boshlab 30 kun ichida ma'lumot o'chiriladi.

Qonunchilikka ko'ra saqlanishi shart bo'lgan yozuvlar (masalan, to'lov tranzaksiyalari) belgilangan muddat davomida saqlanib qoladi.

9. Sizning huquqlaringiz

• O'zingiz haqingizda saqlanayotgan ma'lumotni bilish va nusxasini so'rash.
• Noto'g'ri ma'lumotni tuzatish.
• Ma'lumotni o'chirishni so'rash.
• Ma'lumotga ishlov berishga bergan roziligingizni qaytarib olish yoki xizmatdan voz kechish.
• Telegram ulanishini istalgan vaqtda uzish.

Ushbu huquqlardan foydalanish uchun 11-bo'limdagi manzilga murojaat qiling. Murojaatingizga 30 kun ichida javob beramiz.

10. Siyosatdagi o'zgarishlar

Siyosat yangilanishi mumkin. Yangi tahrir ushbu sahifada e'lon qilinadi; muhim o'zgarishlar haqida elektron pochta yoki platforma orqali kamida 10 kun oldin xabar beramiz.

11. Bog'lanish

Maxfiylik va shaxsga doir ma'lumotlar bo'yicha murojaatlar:

• Telegram: @legalio_admin (qo'llab-quvvatlash), @legalio_bot
• E-mail: [ELEKTRON POCHTA]

Shuningdek qarang: Foydalanuvchi kelishuvi.